كەزدەسۋگە جينالعان جاسوسپىرىمدەردىڭ باسىم كوپشىلىگى كىتاپحانانىڭ تۇراقتى وقىرماندارى. جامبىل اتىنداعى جاسوسپىرىمدەر كىتاپحاناسى ديرەكتورىنىڭ مىندەتىن اتقارۋشى عازيزا نۇرعاليەۆا ء«بىر كەزدەردە كىتاپحاناعا كەلۋشىلەر سانىنىڭ ازايىپ كەتكەنى راس. الايدا مۇنى كىتاپقا قىزىعۋشىلىقتىڭ ازايۋىمەن ەمەس, كەز كەلگەن وقۋ ورنىندا امبەباپ, زاماناۋي كىتاپحانالاردىڭ جاساقتالعاندىعىمەن بايلانىستىرامىز» دەيدى. ال قازىرگى كەزدە كوپشىلىككە ارنالعان كىتاپحانالارعا كەلۋ ءۇردىسى قايتا جاندانا باستادى. بۇگىندە كىتاپحانا قورى 300 مىڭنان اساتىن جامبىل اتىنداعى جاسوسپىرىمدەر كىتاپحاناسىنا كۇنىنە ەلۋ وقىرمان جازىلادى ەكەن. سوڭعى ايداعى كورسەتكىشتەر بويىنشا جازىلۋشىلاردىڭ سانى ون مىڭنان اسقان. كوركەم ادەبيەتتەر, IT, ديزاين, مەديتسينا, ەكونوميكا, اعىلشىن تىلىندەگى كوركەم ادەبيەتتەر مەن ادىستەمەلىك قۇرالدارعا, سونىمەن قاتار پسيحولوگيالىق-فيلوسوفيالىق كىتاپتارعا سۇرانىس ارتىپ كەلەدى.
سونداي-اق ءتۇرلى تاقىرىپتارعا بايلانىستى وتەتىن ترەنينگتەر دە كوبەيگەن. الەۋمەتتىك جەلىلەردىڭ دە ىقپالى بايقالادى. وسى ورايدا مەكتەپ وقۋشىلارى مەن ستۋدەنتتەر ءۇشىن كاسىبي, بىلىكتى مامانداردىڭ كەڭەسى اسا قاجەت. ال كىتاپحانادا جۇزەگە اسىپ جاتقان جوبالار ارقىلى جاسوسپىرىمدەردىڭ ۋاقىتىن ءتيىمدى پايدالانىپ, زامان كوشىنەن قالماۋعا باعىتتاپ وتىرۋعا مۇمكىندىك بار. سورەلەردە ساپ تۇزەگەن كىتاپتار ولاردى ۇلكەن ءومىر جولىندا ءوز ورنىن انىقتاپ, دۇرىس ماقسات قويۋعا, ءبىلىم اياسىن كەڭەيتۋگە ىقپال ەتەتىن بولسا, ارنايى جوبالار اقپاراتتاردى دۇرىس قابىلداپ, جىلدام مەڭگەرۋگە مۇمكىندىك بەرەدى. 2019-2021 جىلعا جوسپارلانعان شارالار اياسىندا جاسوسپىرىمدەر مەن جاستارعا باعىت-باعدار, كەڭەستەر بەرۋ ءۇشىن اي سايىن ءتۇرلى تاقىرىپتارعا ارنالعان كەزدەسۋلەر وتەتىن بولادى. ونىڭ بارىسىندا سالالار بويىنشا ماماندار شاقىرىلىپ, پىكىر الماسۋ مۇمكىندىكتەرى قاراستىرىلعان. سەرپىن كلۋبىنىڭ الداعى جۇمىستارىمەن تانىستىرىپ وتكەن جانسايا سەبەپوۆا ارنايى ازىرلەنگەن بەينەكورىنىستى وقىرماندار نازارىنا ۇسىنسا, بەلگىلى پسيحولوگ كامشات بەكجىگىتوۆا جەتىستىككە جەتۋدىڭ قىر-سىرىنا قاتىستى عىلىمي دايەكتەلگەن تاجىريبەلەر تۇرعىسىندا كوپتەگەن مالىمەتپەن ءبولىستى.
ەلۆيرا سەرىكقىزى,
«ەگەمەن قازاقستان»
الماتى
